Simpoziumi i 3-të Ndërkombëtar “Prof. Rao Ivatury” do të mbahet më 17–18 dhjetor 2026 në Prizren

Kolegji i Kirurgëve të Kosovës njofton se Simpoziumi i 3-të Ndërkombëtar “Prof. Rao Ivatury Update on Trauma, Emergency General Surgery, Critical Care & Burns” do të mbahet më 17–18 dhjetor 2026, në Premium Park Hotel, Prizren.

Përgjatë dy ditëve, Prizreni do të mirëpresë ekspertë, kirurgë dhe profesionistë shëndetësorë nga Kosova, rajoni dhe vende të ndryshme të botës, duke u shndërruar në një qendër të rëndësishme të shkëmbimit shkencor dhe profesional.

Simpoziumi “Prof. Rao Ivatury” po konsolidohet si një nga aktivitetet e rëndësishme shkencore në fushën e traumës dhe kirurgjisë emergjente. Përmes këtij aktiviteti, Kolegji i Kirurgëve të Kosovës vazhdon angazhimin e tij për avancimin e edukimit të vazhdueshëm profesional dhe sjelljen në Kosovë të ekspertizës dhe praktikave bashkëkohore ndërkombëtare.

Edicioni i sivjetmë ka rëndësi të veçantë, pasi organizohet në kuadër të shënimit të 8-vjetorit të themelimit të Kolegjit të Kirurgëve të Kosovës. Ky përvjetor e bën simpoziumin një ngjarje të veçantë për komunitetin kirurgjik dhe mjekësor në Kosovë, rajon dhe më gjerë.

Fushat kryesore

Programi shkencor do të përqendrohet në zhvillimet më të fundit dhe praktikat bashkëkohore në:

• Traumë
• Kirurgji emergjente
• Kujdes intensiv
• Djegie

Programi do të përfshijë ligjërata shkencore nga ekspertë të njohur ndërkombëtarë dhe vendorë, diskutime interaktive dhe shkëmbim të përvojave klinike. Në qendër të programit do të jenë përmirësimi i kujdesit ndaj pacientëve, avancimi i praktikës klinike dhe fuqizimi i edukimit kirurgjik.

Punimet e ligjëruesve do të publikohen në një numër të veçantë të Kosova Journal of Surgery, duke kontribuar në përhapjen e njohurive, promovimin e kërkimit shkencor dhe dokumentimin e zhvillimeve bashkëkohore në fushat e trajtuara.

Informacionet kryesore

Data: 17–18 dhjetor 2026
Vendi: Premium Park Hotel, Prizren

Programi i plotë shkencor, lista e ligjëruesve ndërkombëtarë dhe vendorë, si dhe informacionet për regjistrimin e pjesëmarrësve do të publikohen së shpejti.

Kolegji i Kirurgëve të Kosovës ju mirëpret në Prizren për dy ditë kushtuar dijes, shkëmbimit të përvojave, bashkëpunimit profesional dhe avancimit të kirurgjisë.