Intervistë me Dr. Arta Syla & Dr. Fatlume Arifaj
Dr. Arta Syla & Dr. Fatlume Arifaj: Kolegji i Kirurgëve të Kosovës, mundësi e shkëlqyer drejt avancimit të kirurgjisë
Për Dr. Arta Syla dhe Dr. Fatlume Arifaj, vullneti dhe angazhimi nuk do të mungojnë asnjëherë edhe në të ardhmen, që reflekton në mbështetjen dhe përparimin e shkencave kirurgjikale dhe avancimit të kirurgjisë në Kosovë.
Në një intervistë për Kolegjin e Kirurgëve të Kosovës, Dr. Syla dhe Dr. Arifaj, thanë se do të angazhohen çdo ditë në përfitimin e njohurive të reja dhe arritjen e kompetencave profesionale. Meqë të dyja kanë zënë vendin e parë në arritshmëri në Kursin mbi Edukimin Bazik të Specializantëve të Kirurgjisë – Faza e Parë, ato thanë se “krijimi i një bazamenti të fuqishëm të njohurive dhe kompetencave profesionale, është fundamental në lëmitë e kirurgjisë”.
Edhe pse Dr. Arta Syla është specializante në Kirurgjinë e Fëmijëve, kurse Dr. Fatlume Arifaj, specializante e Mjekësisë Emergjente, të dyja u shprehen se do të jenë prapë pjesëmarrëse në Fazën e Dytë të Kursit mbi Edukimin Bazik.
-Kolegji i Kirurgëve të Kosovës ka përfunduar Kursin mbi Edukimin Bazik të Specializantëve të Kirurgjisë – Faza e Parë. Ju jeni dalluar në këtë kurs për pjesëmarrje aktive. Çfarë do të thotë ky kurs për ju dhe a i keni arritur pritshmëritë tuaja?
Dr. Arta Syla: Kirurgjia si shkencë aplikative, mjaft fisnike dhe njëkohësisht komplekse, kërkon angazhim të vazhdueshëm në përfitimin dhe mirëmbajtjen e kompetencave profesionale. Kursi në fjalë me 16 aftësi thelbësore kirurgjikale, duke filluar nga parimet e asepsis dhe lidhjes së nyjeve, deri të aftësitë bazike laparoskopike dhe anastomozat, e bazuar në kurikulën e Kolegjit Amerikan të Kirurgjisë (ACS) ishte gjithëpërfshirës, ndërveprues dhe shumë i përshtatshëm për rifreskimin e njohurive dhe kompetencave bazike, për ne si specializantë të viteve të para në lëmitë kirurgjikale.
Dr. Fatlume Arifaj: Fillimi dhe mbarëvajtja e këtij kursi ka pasur shumë rëndësi për mua në aspektin profesional dhe kolegial. Kam përfituar njohuri të reja profesionale si dhe kam arritur të krijoj kontakte me të afërta me kolegët prezentë. Më duhet patjetër ta theksoj që përvoja ime si ndihmës-ligjëruese ka qenë e jashtëzakonshme, për të cilën ju falënderoj shumë.
-Ju të dyja keni zënë vendin e parë në arritshmëri në këtë kurs. Si keni arritur një sukses kaq të lartë?
Dr. Arta Syla: Të qenurit kirurge/mjeke, për mua nuk është vetëm një profesion, por edhe një stil jete, për çka angazhohem çdo ditë në përfitimin e njohurive të reja dhe arritjen e kompetencave profesionale. Kjo përmes konsultimit të literaturës, hulumtimeve shkencore të kohës, por edhe pjesëmarrjes aktive në trajnime dhe kurse, një ndër ta edhe Kursin mbi Edukimin Bazik të Specializantëve të Kirurgjisë.
Dr. Fatlume Arifaj: Ky sukses ka të bëjë me mbarëvajtjen e rregullt dhe interesimin e shtuar mbi temat e prezantuara, si dhe aplikimin e teorive të mësuara në punën time të përditshme.
-Dr. Syla, jeni specializante në Kirurgjinë e Fëmijëve, përderisa ju Dr. Arifaj specializante në Mjekësi Emergjente. Sa ju ka ndihmuar Kursi në fjalë, në avancimin tuaj profesional?
Dr. Arta Syla: Empirika e çdo intervenimi kirurgjik, por edhe e çdo shërbimi mjekësor, kërkon që të arrihen rezultate përfundimtare funksionale, anatomike dhe estetike të larta. Krijimi i një bazamenti të fuqishëm të njohurive dhe kompetencave profesionale, është fundamental në kirurgji, dhe kursi në fjalë ka impaktin e pamohueshëm në avancimin profesional, dhe në kualitetin e shërbimeve kirurgjike të përditshme.
Dr. Fatlume Arifaj: Jam specializante në Mjekësinë Emergjente, dhe mund të them me plotë përgjegjësi se përvoja ime në kuadër të Kursit mbi Edukimin Bazik të Specializantëve të Kirurgjisë – Faza e Parë, ka qenë profesionalisht shumë fitimprurëse, dhe e domosdoshme për profesionin tonë. Jemi falënderues Kolegjit të Kirurgëve të Kosovës, për këtë iniciativë e cila na ka ndihmuar në avancimin tonë profesional.
-A do të vazhdoni me pjesëmarrjen tuaj në Fazën e Dytë të Kursit mbi Edukimin Bazik?
Dr. Arta Syla: Pa dyshim që është në interesin tim të vazhdoj ndjekjen e fazës së dytë të kursit mbi Procedurat e Avancuara Kirurgjike dhe Laparaskopike, në kuadër të edukimit të vazhdueshëm profesionalë.
Dr. Fatlume Arifaj: Duke marrë parasysh përvojën e duhur të fazës së parë të këtij kursi, më shumë kënaqësi do të jem prezente edhe në në Fazën e Dytë të Kursit mbi Edukimin Bazik.
-Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes Kongresit Klinik, kurseve, punëtorive dhe komiteteve, sa jeni e gatshme të kontribuoni në këtë drejtim?
Dr. Arta Syla: Si specializante, kontributin tim e kam filluar së pari në rolin e Anëtarit të Bordit të Drejtorëve të Kolegjit të Kirurgëve të Kosovës, pastaj si pjesëmarrëse aktive me nga dy punime shkencore në Kongresin e Dytë dhe të Tretë të KKK-së. Vullneti dhe angazhimi im nuk do të mungojnë as në të ardhmen në mbështetjen dhe përparimin e shkencave kirurgjikale dhe avancimit të kirurgjisë në Kosovë.
Dr. Fatlume Arifaj: Edhe pse jam specializante e Mjekësisë Emergjente, jam e gatshme të ndihmojë në çdo aspekt mbarëvajtjen e këtij dhe kurseve tjera, në kuadër të Kolegjit të Kirurgëve të Kosovës. KKK, për ne si mjek të rinj është një mundësi e shkëlqyer për të shkëmbyer përvoja me vendet apo shtetet që tashmë shkencën dhe kirurgjinë e kanë shumë të avancuar.