Intervistë me Prof. Ass. Dr. Vlora Ibishi
Prof. Ass. Dr. Vlora Ademi-Ibishi: Kolegji i Kirurgëve të Kosovës, organizatë lidere në Kosovë që bashkon të gjithë kirurgët
Për Prof. Ass. Dr. Vlora Ademi-Ibishi, Kolegji i Kirurgëve të Kosovës është organizatë lidere në Kosovë, e cila bashkon të gjithë kirurgët përmes programeve edukative, trajnimeve, kongreseve dhe konferencave, duke kontribuar në përmirësimin e kujdesit, standardeve dhe sigurisë në fushën e Kirurgjisë.
Në një intervistë për Kolegjin e Kirurgëve të Kosovës ajo tha se “aktiviteti dhe kontributi për ngritjen e kapaciteteve dhe avancimin e gjeneratave të reja: studentëve, specializantëve-specialistëve të ardhshëm është obligim i secilit prej nesh, prandaj ne të gjithë duhet të punojmë për të ardhmen e këtij vendi, e ardhmja e vendit tonë janë gjeneratat që ne lëmë pas”.
Prof. Ass. Dr. Vlora Ademi-Ibishi, është Gjinekologe Obstetër, Shefe e Departamentit të Mjekësisë së Përgjithshme, Fakulteti i Mjekësisë – Universiteti i Prishtinës, Kryetare e Këshillit Organizativ dhe Mbikëqyrjes së Kursit Bazik për Specializantët, Kryetare e Komitetit për Specializime në kuadër të Kolegjit të Kirurgëve të Kosovës, dhe anëtare e Komitetit për studentët e Mjekësisë në Kirurgji.
– Kolegji i Kirurgëve të Kosovës është një organizatë ku rreth vetes mbledhë kirurgët e lëmive të ndryshme, jo vetëm nga Kosova por edhe nga mbarë bota. Si e vlerësoni punën dhe angazhimin e KKK-së deri më tani?
Dr. Ademi-Ibishi: Kolegji i Kirurgëve të Kosovës është organizatë lidere në Kosovë e cila bashkon të gjithë kirurgët dhe përmes programeve edukative, trajnimeve, kongreseve dhe konferencave kontribuon në përmirësimin e kujdesit, standardeve dhe sigurisë në fushën e Kirurgjisë.
-Jeni Kryetare e Këshillit Organizativ dhe Mbikëqyrës të Kursit të Specializantëve, Kryetare e Komitetit për Specializime në kuadër të Kolegjit të Kirurgëve të Kosovës dhe anëtarë e Komitetit për Studentët e Mjekësisë në Kirurgji. Sa jeni e kënaqur me aktivitetet e këtij Komiteti dhe cilat janë objektivat që ju prisni si rezultat i punës së përbashkët?
Dr. Ademi-Ibishi: Në cilësi të Kryetares së Komitetit për Specializime konsideroj se Kursi Bazik për Specializantët me gjithsej 12 Module është përmbyllur me sukses. Kjo është mundësuar përmes bashkëpunimit dhe kontributit të Komiteteve, si dhe profesionistëve të fushës së Kirurgjisë, por gjithashtu përmbyllja e suksesshme i atribuohet edhe interesimit dhe pjesëmarrjes aktive të specializantëve. Përmes këtij kursi, specializantëve iu është mundësuar zhvillimi i njohurive dhe shkathtësive kirurgjike, të cilat njëherit edhe kanë qenë objektivat e këtij Kursi.
-Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes kurseve, punëtorive dhe komiteteve. Ju jeni pjesë e një Komiteti të lartpërmendur. Sa jeni e gatshme të kontribuoni edhe në aktivitetet tjera të lartpërmendura?
Dr. Ademi-Ibishi: Aktiviteti dhe kontributi për ngritjen e kapaciteteve dhe avancimin e gjeneratave të reja, studentëve, specializantëve-specialistëve të ardhshëm është obligim i secilit prej nesh. Ne duhet të punojmë për të ardhmen e këtij vendi, dhe e ardhmja e vendit tonë janë gjeneratat që ne lëmë pas.
– Kolegji i Kirurgëve të Kosovës është në përgatitje për Kongresin e Tretë Klinik, që sivjet mbahet me 12-15 Tetor. Si e vlerësoni zhvillimin e Kongresit të Parë dhe të Dytë Klinik të KKK-së?
Dr. Ademi-Ibishi: Kongresi i Dytë Klinik i organizuar nga Kolegji i Kirurgëve të Kosovës është shembull i mirë, model si për nga organizimi, pjesëmarrja dhe nga përmbajtja e punimeve shkencore të prezantuara. Kongresin e ka bërë të veçantë pjesëmarrja masive e kirurgëve shqiptarë nga vendet e zhvilluara dhe klinikat me renome, të cilët edhe kanë hapur perspektivat e mundësive të bashkëpunimit dhe kontributit në Kosovë.
– Si e vlerësoni bashkëpunimin e kirurgëve shqiptarë nga diaspora, dhe a mendoni se angazhimi i tyre në vendin e origjinës është i mjaftueshëm?
Dr. Ademi-Ibishi: Konsideroj se kirurgët shqiptarë nga diaspora mund të kontribuojnë edhe më shumë në vendin e origjinës. Mendoj se te ata ekziston gatishmëria dhe vullneti, mirëpo në këtë drejtim nevojitet mbështetje nga institucionet e Kosovës, përkatësisht politikëbërësit, të cilët duhet zhvilluar politika mbështetëse dhe plane/ projekte konkrete, për të mundësuar dhe lehtësuar kontributin e kirurgëve nga diaspora në Kosovë.
-Cilat janë të arriturat për këtë vit të Klinikës së Gjinekologjisë dhe Obstetrisë, dhe çfarë prisni në përmirësimin e shërbimeve shëndetësore dhe asaj shkencore?
Dr. Ademi-Ibishi: Klinika e Gjinekologjisë me Obstetrikë punon në vazhdimësi në rritjen e numrit të shërbimeve që ofron, por edhe në rritjen e cilësisë së kujdesit. Prej shërbimeve të reja do të veçoja punën që po bëhet në funksionalizimin e qendrës së IVF, si dhe funksionalizimin e Njësisë Fetale, ndërsa në aspektin shkencor, jemi duke punuar në rritjen e kapaciteteve hulumtuese.