Intervistë me Prof. Dr. Ilirijana Haxhibeqiri – Karabdiç
Prof. Dr. Ilirijana Haxhibeqiri – Karabdiç: Kolegji i Kirurgëve të Kosovës- vlerë e shtuar për komunitetin e kirurgëve
Kolegji i Kirurgëve të Kosovës, sipas Prof. Dr. Ilirijana Haxhibeqiri – Karabdiç, shefe e Departamentit për Kirurgjinë Kardiovaskulare në Qendrën Klinike Universitare në Sarajevë, ka bërë jehonë mjaft të madhe në organizimin, informimin dhe komunikimin e komunitetit të kirurgëve në Kosovë dhe diasporë. Në një intervistë për Kolegjin e Kirurgëve të Kosovës, ajo deklaroi se personalisht si KARDIOKIRUGRE, ka ofruar bashkëpunim dhe dhënie të shërbimeve profesionale vendin të saj të origjinës, Kosovës që nga viti 2008.
-Kolegji i Kirurgëve të Kosovës, është në përgatitje për Kongresin e radhës. Meqë ju keni qenë pjesë e Kongresit të Parë Klinikë, dhe do të merrni pjesë edhe në Kongresin e Tretë të KKK-së që mbahet sivjet me 12-15 Tetor, si c vlerësoni zhvillimin e dy Kongreseve të KKK-së?
Prof. Dr. Ilirijana Haxhibeqiri – Karabdiç: Themelimi i Kolegjit të Kirurgëve të Kosovës është një hap dhe ndodhi për gjithë komunitetin e kirurgëve si të Kosovës, ashtu edhe të gjithë atyre që punojnë kirurgjinë në Evropë dhe Amerikë, e që njëherit prezantojnë vlerat dhe virtytet e popullit shqiptar kudo që punojnë dhe veprojnë. Kolegji i Kirurgëve te Kosovës, natyrisht në fillim ka pasur disa sfida që është edhe e natyrshme, por mendoj se me kohë edhe Kongresi i Tretë që këtë vit mbahet në muajin Tetor, do të jetë edhe më profesional dhe përmbajtës për komunitetin e kirurgëve, dhe do të ketë vlerë të shtuar për Kolegjin e Kirurgëve të Kosovës.
-Meqë qëllimi i Kolegjit të Kirurgëve të Kosovës, është të mbledh afër vetës kirurgët botëror, e sidomos të diasporës shqiptare, sa mendoni se kirurgët shqiptarë janë në dijeni për misionin dhe aktivitetet e KKK-së?
Prof. Dr. Ilirijana Haxhibeqiri – Karabdiç: Mendoj se Kolegji i Kirurgëve të Kosovës, ka bërë jehonë mjaft të madhe në organizimin, informimin dhe komunikimin e komunitetit të kirurgëve në diasporës dhe se ekspertët e kirurgjisë shqiptare tani më, në diasporë janë të informuar, por duhet pasur parasysh edhe angazhimet e tyre nëpër vende ku ata punojnë dhe veprojnë.
-Kirurgët shqiptarë kanë arritur shumë suksese në shkencë dhe në punën e tyre në vende të ndryshme të botës. Megjithatë, angazhimi i tyre në vendin e origjinës mbetet i pamjaftueshëm. Si mendoni se ata mund të angazhohen dhe të kontribuojnë më shumë në Kosovë?
Prof. Dr. Ilirijana Haxhibeqiri – Karabdiç: Është e vërtet se kirurgët shqiptarë nëpër botë kanë arritur nivelet më të larta të profesionalizmit dhe ekspertizës kirurgjike, dhe se ajo ekspertizë dhe potencial duhet te shfrytëzohet maksimalisht dhe mund të themi se një formë e ofrimit të këtij potenciali profesional natyrisht është edhe nëpërmjet prezantimeve, ligjëratave në Kolegjin e Kirurgëve të Kosovës, dhe atë fal angazhimit të madh të Prof. Dr. Rifat Latifit dhe komunitetit të kirurgëve të Kosovës që e formuan.
Personalisht si KARDIOKIRUGRE kam ofruar bashkëpunimin tim dhe dhënien e shërbimeve profesionale vendin tim të origjinës, Kosovës që nga viti 2008 me gjithë ekipin tim, por se nuk ka pasur as vullnet as dëshirë nga institucionet shtetërore që të ofrojmë kontributin tonë vendlindjes dhe popullit, që ka aq shumë nevojë. Gjatë viteve me radhë nga kjo periudhë kam pasur prezantime televizive në Kosovë, nëpër mediume të ndryshme, por është hera e parë që prezantimi im profesional dhe si Kardiokirurge me përvojë të gjatë, të jetë në auditoriumit profesional kosovar, në Kongresin e parë të Kolegjit të Kirurgëve të Kosovës. Ministra e Shëndetësisë, duhet të përpilojë politikat shëndetësore dhe shtetërore të Kosovës, që të bëjnë shtytje procesit të angazhimit të kirurgëve shqiptarë në diasporë, qoftë nëpërmjet trajnimeve profesionale, qëndrimeve dhe angazhimeve në sistemin shëndetësor publik të Kosovës.
-Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes kurseve, punëtorive dhe komiteteve. Sa jeni ju e gatshme të kontribuoni në këtë drejtim?
Prof. Dr. Ilirijana Haxhibeqiri – Karabdiç: Edhe një herë e them se në forma në ndryshme, kam qenë edhe ende jam e gatshme të ofrojë ekspertizën time profesionale nga fusha specifike e më sfiduese të kirurgjisë, siç është ajo që unë e zotërojë atë të KARDIOKIRURGJISË.
Profili i Prof. Dr. Ilirijana Haxhibeqiri – Karabdiç
Prof. Dr. Ilirijana Haxhibeqiri – Karabdiç – është Profesoreshë e Kardiokirurgjisë në Fakultetin e Shkencës dhe Teknologjisë në Sarajevë – Fakultetin e Mjekësisë të Sarajevës, në Sarajevë, Bosnjë dhe Hercegovinë dhe Shefe e Departamentit për Kirurgjinë Kardiovaskulare në Qendrën Klinike Universitare në Sarajevë. Ajo është anëtare e Shoqatës së Kirurgëve të Bosnjës dhe Hercegovinës, Shoqatës së Mjekësisë Interne të Bosnjës dhe Hercegovinës, Shoqatës për Pajisjet Asistuese, Shoqatës Ndërkombëtare të Kirurgjisë Kardiotorakale dhe Vaskulare Ronald Hetzer (RHICS), Shoqatës Evropiane për Kirurgjinë Kardiake – Torakale (EACTS), dhe Regjistrit Evropian për Pacientët me Mbështetje Mekanike të Qarkullimit (EUROMACS). Ajo është mentore dhe bashkë-mentore për specializime dhe ‘fellowship’ për Kirurgji Kardiovaskulare, e caktuar nga Ministria e Shëndetësisë e Bosnjës dhe Hercegovinës.
Prof. Dr. Haxhibeqiri-Karabdiç është anëtare e Komitetit për Zhvillim dhe Përmirësim të Kirurgjisë Kardiake në nivelin shtetëror në Bosnjë dhe Hercegovinë. Ajo ishte Presidente e Komitetit Etik të Qendrës Klinike Universitare në Sarajevë nga viti 2016 deri në vitin 2020. Ka marrë pjesë në punëtori të ndryshme, kongrese dhe seminare në tërë botën (Paris, Londër, Berlin, Bruksel, Barcelonë, Houston etj.). Në vitin 2019 ajo ishte Profesoreshë Vizituese në Spitalin Memorial Hermann në Huston, Teksas, SHBA.
Prof. Dr. Haxhibeqiri-Karabdiç u diplomua në Fakultetin e Mjekësisë të Universitetit të Sarajevës, në Bosnjë dhe Hercegovinë, në vitin 1994. Ajo përfundoi praktikën e saj në Spitalin John Radcliffe në Londër, Mbretërinë e Bashkuar, nga viti 1995 deri në vitin 1996. Për më tepër, në vitin 1997 ajo filloi të punojë në Qendrën Klinike Universitare në Sarajevë. Specializimin e përfundoi në Kirurgjinë Kardiovaskulare në vitin 2004 në Deutsche Herzzentrum Berlin në Berlin, Gjermani, nën mentorimin e Prof.Dr. Ronald Hetzer, Prof.Dr. Miralem Pašić, dhe Prof.Dr. Charles Yankah. Ndërsa punonte në Berlin, ajo ishte anëtare e një ekipi për transplantime të zemrës dhe Mbështetje Mekanike të Qarkullimit të Gjakut. Ajo u bë personi i parë në Bosnjë dhe Hercegovinë që arriti të merrte specializimin në Kirurgjinë Kardiovaskulare. Prof. Dr. Haxhibeqiri-Karabdiç u bë Magjistre e Shkencave Mjekësore – në Kardiokirurgji, në vitin 2008. Ajo mori kualifikimin PhD në vitin 2014. Për më tepër, po në vitin 2014 ajo u bë Profesoreshë-Asistente. Në vitin 2018, ajo u bë Profesoreshë e Kardiokirurgjisë. Prof. Dr. Haxhibeqiri-Karabdiç është autore e shumë artikujve shkencorë, si dhe gjithashtu autore dhe bashkëautore e disa librave. Për më tepër, në vitin 2018, ajo mori një Çmim për zhvillimin, arritjet e jashtëzakonshme dhe përmirësimin e shëndetit në Bosnjë dhe Hercegovinë.