Intervistë me Ass. Prof. Dr. Mentor Ahmeti, Nënkryetar i Kolegjit të Kirurgëve të Kosovës për SHBA
Ass. Prof. Dr. Mentor Ahmeti: Emërimi i Nënkryetarëve për diasporë nga Kolegji do të ndikojë pozitivisht në angazhimin e profesionistëve shqiptarë.
Organizimet e Kolegjit të Kirurgëve të Kosovës, sipas Ass. Prof. Dr. Mentor Ahmeti, në rend të parë të Kongresit Klinik, jo vetëm që forcojnë cilësinë e shërbimit shëndetësor në Kosovë, por gjithashtu reflektojnë talentin e kirurgëve kosovarë në rajon dhe më tej.
Ass. Prof. Dr. Mentor Ahmeti, i cili është Drejtor i Çështjeve Akademike dhe Kërkimore, Drejtor i Asociuar për Specializantë, Shef i Shërbimit të Traumës në Sanford Medical Center në Fargo, North Dakota, Kryetar Pasues i Kolegjit Amerikan të Kirurgëve, Dega e Dakotës së Veriut, Nënkryetar i Kolegjit të Kirurgëve të Kosovës për SHBA, tha se “jam i bindur që edukimi shëndetësor në Kosovë dhe Shqipëri duhet të çkapet nga nevoja për ndihmë të jashtme, dhe të pavarësohet si një sistem edukativ vetanak i nivelit të lartë”.
Në një intervistë për Kolegjin e Kirurgëve të Kosovës, ai konsideron se organizimi i Kongresit është në nivel botëror, dhe shpreson se me kohë do të shoh më shumë pjesëmarrje aktive të specializantëve kirurgjik, me prezantimet e punës së tyre shkencore. Ai shtoi se iniciativa e fundit e Kolegjit për caktimin e Nënkryetarëve për diasporë, do të ndikojë pozitivisht për informimin dhe angazhimin e mëtejmë të profesionistëve të interesuar shqiptar në diasporë.
– Kolegji i Kirurgëve të Kosovës është në përgatitje për Kongresin e radhës. Ju do të merrni pjesë në Kongresin e Tretë Klinik të KKK-së, që do të mbahet sivjet më 12-15 Tetor. Si e vlerësoni zhvillimin e dy Kongreseve të mëparshme të Kolegjit të Kirurgëve të Kosovës?
Dr. Ahmeti: Kam pasur nderin të marr pjesë në Kongresin e Parë të Kolegjit të Kirurgëve të Kosovës, dhe jam impresionuar me nivelin e organizimit dhe frymëzuar me cilësinë e prezantimeve dhe interesin e kirurgëve të Kosovës në pjesëmarrje. Organizimet e tilla të Kolegjit, jo vetëm që forcojnë cilësinë e shërbimit shëndetësor në Kosovë, mirëpo gjithashtu reflektojnë talentin e kirurgëve kosovarë në rajon dhe më tej.
– Çfarë sugjeroni që në Kongresin e Tretë Klinik të Kolegjit të Kirurgëve të Kosovës të jetë më ndryshe?
Dr. Ahmeti: Sinqerisht konsideroj që organizimi i Kongresit është në nivel botëror. Shpresoj, që me kohë do të shoh më shumë pjesëmarrje aktive të specializantëve kirurgjik, me prezantimet e punës së tyre shkencore.
– Meqë qëllimi i Kolegjit të Kirurgëve është të mbledh afër vetës kirurgët botëror, e sidomos të diasporës shqiptare, sa mendoni se kirurgët shqiptarë janë në dijeni për misionin dhe aktivitetet e KKK-së?
Dr. Ahmeti: Unë personalisht si anëtar i Kolegjit të Kirurgëve të Kosovës jam mirë i njoftuar me misionin dhe punën e suksesshme të Kolegjit. Mendoj që iniciativa e fundit e Kolegjit për emërimin e Nënkryetarëve për diasporë do të ndikojë pozitivisht për informimin dhe angazhimin e mëtejmë të profesionistëve të interesuar shqiptarë në diasporë.
– Kirurgët shqiptarë kanë arritur shumë suksese në shkencë dhe në punën e tyre në vende të ndryshme të botës. Megjithatë, angazhimi i tyre në vendin e origjinës mbetet i pamjaftueshëm. Si mendoni se ata mund të angazhohen dhe të kontribuojnë më shumë në Kosovë?
Dr. Ahmeti: Nuk mendoj që angazhimi i kirurgëve shqiptarë të diasporës në Kosovë mund të cilësohet si i pamjaftueshëm. Duhet të kuptohet se kirurgët në diasporë kanë karrierën e tyre, familjet e tyre, rrethin dhe jetën e përditshme dhe koha e lirë është shumë e kufizuar ose jo-ekzistente. Ndikimi i tyre aplikohet nëpërmjet vet emrit të përveçëm të tyre në rrethet profesionale ku ekzistojnë. Në mënyrë që të arrihet një nivel profesional dhe ekpertizë, duhet të paktën dy dekada të impenjimit maksimal profesional-shkencor në institucionet e jashtme, për të ndërtuar ndikimin që pastaj të kontribuohet në atdhe. Diaspora jonë profesionale ka një histori shumë të shkurtër. Në vitet e ‘80 kanë qenë 1-2 kirurgë në diasporë, në të ‘90 më pak se 10 kirurgë. Angazhimi i gjeneratave të reja do të shihet së shpejti – nuk kam dyshim.
– Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes kurseve, punëtorive dhe komiteteve. Sa jeni ju i gatshëm të kontribuoni në këtë drejtim?
Dr. Ahmeti: Unë kam gatishmëri të vazhdueshme të kontribuoj në edukimin e profesionistëve shëndetësor në Kosovë. Si dëshmi është pjesëmarrja ime në Kongresin e Parë, pjesëmarrja në Simpoziumin e Traumës dhe së fundmi organizimi i parë i kursit Advanced Trauma Life Support (ATLS) Kosova, që konsiderohet si standardi më i lartë i certifikimit për shërbimin e traumës. Pres me entuziazëm pjesëmarrjen në Kongresin e Tretë!
Duke përmendur këtë, dua gjithashtu të shpreh filozofinë time të edukimit, ku unë jam i bindur që edukimi shëndetësor në Kosovë dhe Shqipëri duhet të çkapet nga nevoja për ndihmë të jashtme dhe të pavarësohet si një sistem edukativ vetanak i nivelit të lartë. Jam i bindur që kjo do të realizohet nga profesionistët e mrekullueshëm vendorë gjatë një procesi afatgjatë.