Intervistë me Lumnije Kqiku – Biblekaj, MD, DDS, Ph.D
11 Korrik, 2023
Prof. Dr. Lumnije Kqiku- Biblekaj: Puna e Kolegjit të Kirurgëve të Kosovës ka të bëjë me zhvillimin e sektorit të shëndetësisë
Në një intervistë për Kolegjin e Kirurgëve të Kosovës, Prof. Dr. Lumnije Kqiku-Biblekaj, Nënkryetare e Traumatologjisë Dentare Austriake, mes tjerash shprehet e gatshme që gjithmonë të kontribuojë për vendin e saj të origjinës, në çfarëdo forme dhe mënyre që kërkohet nga shteti i republikës së Kosovës
Ajo gjithashtu theksoi: “Shpresoj se me punën e jashtëzakonshme që po bënë Kolegji i Kirurgëve të Kosovës, ta vazhdojmë bashkë edhe me të tjerët, pasi që të gjitha aktivitetet dhe iniciativat kanë të bëjnë me zhvillimin e sektorit të shëndetësisë, për kushte e shërbime sa më të mira për qytetarët. Ne po bëjmë përpjekje maksimale që të jemi më afër të rejave evropiane që lidhen me sektorin e shëndetësisë dhe realisht po bëjmë të pamundurën për të realizuar me sukses shumë misione e prezantime që realisht shkojnë në favor të shtetit të Kosovës.”
– Kolegji i Kirurgëve të Kosovës, është në përgatitje për Kongresin e radhës. Meqë ju keni qenë pjesë e Kongresit të fundit, dhe do të merrni pjesë edhe në Kongresin e Tretë të KKK-së që mbahet sivjet më 12-15 Tetor, si e vlerësoni zhvillimin e Kongresit të Dytë Klinik të Kolegjit të Kirurgëve të Kosovës?
Dr. Kqiku-Biblekaj: Kongresi i Dytë Klinik ishte tejet i suksesshëm, duke realizuar mbajtjen e ligjëratave ndërkombëtare dhe vendore me ligjërues të njohur për kirurgjinë botërore si dhe punëtorive profesionale, me të cilat Kolegji i Kirurgëve të Kosovës dëshmoi që dita-ditës është i përcaktuar për arritjen e synimeve të përcaktuara.
Me këto prezantime ne po arrijmë të zbulojmë dhe të përkrahim edhe kuadro të reja që kanë kapacitete e dije shkencore të kalibrit botëror. Jemi një ekip i mirë i studiuesve të profileve të ndryshme prej nga po japim maksimumin nga vetja, vetëm që të dalim serioz dhe të organizuar para të tjerëve.
– Çfarë sugjeroni që në Kongresin e Tretë Klinik të Kolegjit të Kirurgëve të Kosovës të jetë më ndryshe?
Dr. Kqiku-Biblekaj: Përpos ligjëruesve ndërkombëtar t’i shtohet vëmendje edhe me tepër ligjërueseve vendor si dhe anëtarëve themelues të Kolegjit, dhe me këtë të shprehim mirënjohje për punën dhe përkushtimin e pafund të tyre që po bëjnë. Po ashtu, pjesëmarrësit në tërësi duhet të jenë më shumë prezent gjatë kohës së prezantimeve në vendin ku prezantohet e jo gjetiu.
Është e dobishme që nga këto simpoziume e prezantime të krijojmë një arkivë e cila do të na shërbejë si agjendë për kongreset tjera vijuese. Kongreset duhet të tregojnë përkushtimin tonë dhe seriozitetin e secilit pjesëmarrës. Mos harroni se nga këto kongrese dalin punime me referenca të jashtëzakonshme në të gjitha rrafshet.
– Meqë qëllimi i Kolegjit të Kirurgëve është të mbledh afër vetës kirurgët botëror, e sidomos të diasporës shqiptare, sa mendoni se kirurgët shqiptarë janë në dijeni për misionin dhe aktivitetet e KKK?
Dr. Kqiku-Biblekaj: Kirurgët dhe kolegët tjerë në diasporë janë në dijeni për misionin dhe aktivitetet e Kolegjit të Kirurgëve të Kosovës, dhe të gatshëm për të bashkëpunuar. Këtë e kanë dëshmuar me pranimin e të qenurit anëtarë të Kolegjit të Kirurgëve të Kosovës si dhe Komitetit për Marrëdhënie Ndërkombëtare.
Megjithatë, ju takon ekspertëve që të paraqiten vullnetarisht për të dhënë kontributin në mënyrë që edhe ata të jenë pjesë e anijes sonë e cila po lundron saktë dhe me rezultate të pranueshme.
Po ashtu, edhe kirurgët tjerë jo shqiptarë në këtë rast austriakët, janë shumë në dijeni për misionin tonë, për të cilin është raportuar disa herë në mediat austriake, bile edhe me vendosjen e linkut të Kolegjit të Kirurgëve të Kosovësvnë Top News faqen e një ndër Universiteteve më prestigjioze në Evropë, siç është Universiteti Mjekësor i Grazit.
– Kirurgët shqiptarë kanë arritur shumë suksese në shkencë dhe në punën e tyre në vende të ndryshme të botës. Megjithatë, angazhimi i tyre në vendin e origjinës mbetet i pamjaftueshëm. Si mendoni se ata mund të angazhohen dhe të kontribuojnë më shumë në Kosovë?
Dr. Kqiku-Biblekaj: E gjithë kjo arrihet përmes interesimit të tyre personal për të ndihmuar Kosovën. Po ashtu, edhe përmes lidershipit të Kolegjit gjegjësisht të Komitetit për Marrëdhënie Ndërkombëtare, nëpërmjet formave organizuese, si p.sh: të kërkohet dhe të mbështet ndihma e tyre në zhvillimin dhe trajnimin e vazhdueshëm të stafit vendor, aty ku është e nevojshme, si dhe organizimin e konferencave ndërkombëtare nëpërmjet Komitetit për Marrëdhënie Ndërkombëtare, dhe me rrjetëzimin e kirurgëve të diasporës dhe sensibilizimin e tyre për bashkëpunimin e ndërsjellët, duke arritur ngritjen e nivelit shkencor akademik dhe klinik.
– Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes kurseve, punëtorive dhe komiteteve. Sa jeni ju e gatshëm të kontribuoni në këtë drejtim?
Dr. Kqiku-Biblekaj: Unë jam e gatshme gjithmonë të kontribuojë për vendin tim, në çfarëdo forme dhe mënyre që kërkohet nga shteti im! Unë këtë e kam dëshmuar edhe me angazhimin tim në kabinetin e Ministrit të Shëndetësisë, Prof. Dr. Rifat Latifi, si këshilltare e jashtme si dhe me pranimin e postit si Nënkryetare e Kolegjit të Kirurgëve të Kosovës, dhe kryetare e Komitetit për Marrëdhënie Ndërkombëtare.
Shpresoj që punën e jashtëzakonshme që po bënë Kolegji në krye me Prof. Dr. Rfat Latifin, ta vazhdojmë gjithë së bashku edhe me të tjerët, pasi që të gjitha kanë të bëjnë me zhvillimin e sektorit të shëndetësisë dhe kushte e shërbime sa më të mira për qytetarët!
Megjithatë, për të arritur këto synime dhe objektiva na duhet përkrahja edhe më e fuqishme e institucioneve të Kosovës, të cilat kanë obligim moral që të mbështesin dijen dhe trurin e diasporës, e cila sikurse në këtë rast po tregohet e gatshme dhe e vullnetshme për të quar gjërat përpara në rrafshin profesional e shkencor.
Profil i Prof. Dr. Lumnije Kqiku- Biblekaj
Dr. Luminje Kqiku-Biblekaj, MD, DDS, PhD, diplomoi në Fakultetin e Mjekësisë, Dega e Stomatologjisë, në Universitetin e Prishtinës në vitin 1998. Në vitin 1999 vendoset në Kliniken Dentare të Universitetit të Gracit si hulumtuese e lartë shkencore. Përfundoi specializimin në Sëmundjet e Dhëmbit me Endodoncion si dhe subspecializimin në fushën Traumatologjisë Dentare. Në vitin 2004 nostrifikoi diplomën në Universitetin Mjekësor të Gracit (Austri) ku edhe mbrojti magjistraturën për të përfunduar doktoratën në vitin 2006. Gjatë vitit 2007 ishte në vizitë studimore si hulumtuese e lartë shkencore në Fakultetin e Stomatologjisë në Universitetin e Zagrebit, si dhe në vitin 2010 në Universitetin Mjekësor të Tübingen-it, Gjermani. Është ligjëruese e lartë për studentët e Mjekësisë së Përgjithshme, Stomatologjisë dhe studimeve postdiplomike. Nga viti 2022 është Udhëheqëse e Klinikës Speciale të Endodoncionit dhe Traumatologjisë Dentare, Prodekane për Studimet e doktoraturës ne seksionin e Stomatologjisë si dhe koordinatore për CEEPUS (Central European Exchange Program for University Studies). Ajo është gruaja e parë nga Kosova dhe Shqipëria që më 2011 hyn në librin enciklopedik më prestigjioz në botë “Who’s Who in the World”, libër ky që boton biografitë e personave të cilët shquhen për të arriturat e tyre dhe karrierën e jashtëzakonshme. Që nga viti 2018 mban pozicionin akademik Univ. Doz. Dr. med. dent në Universitetin Mjekësor Graz, Austri. Ajo ka marrë shumë çmime kërkimore dhe është ftuar në shumë vende ku ka mbajtur leksione të shumta “keynote” dhe ka shërbyer si eksperte e traumatologjisë dentare. Është autore dhe bashkautorë e punimeve të shumta profesionale dhe shkencore. Ka marrë pjesë aktive në kongrese ndërkombëtare dhe vendore. Është anëtare e shumë shoqatave dentare vendore dhe ndërkombëtare, njëherit edhe recensente e shumë revistave shkencore. Po ashtu, është Vice President of the Austrian Dental Traumatology, Nënkryetare e Kolegjit të Kirurgëve të Kosovës për Evropë, Kryetare e Komitetit për Diasporë e Kolegjit te Kirurgeve te Kosovës si dhe bartëse e çmimit “Personalitet nderi me medalje të artë”, nga qyteti i Grazit të Austrisë për të arriturat shkencore.