Çmimi “Udhëheqja përmes Shembullit”, është çmim që i dedikohet veçanërisht kirurgëve tanë nga jashtë vendit të cilët kanë kontribuar dhe kontribuojnë për kirurgjinë në vend, si dhe kirurgëve vendorë që kanë dhënë poashtu kontribut për kirurgjinë dhe më gjerë.
Kolegji i Kirurgëve të Kosovës ka ndarë çmimin “Udhëheqja përmes Shembullit” në Darkën Gala të Kongresit të Tretë Klinik, më 14 tetor 2023.
Mentor Ahmeti, MD, FACS, Nënkryetar i Kolegjit të Kirurgëve të Kosovës për SHBA, është kirurg i Traumës, Kujdesit Akut dhe Kritik në Qendrën Mjekësore Sanford në Fargo, Dakotën e Veriut. Ai është Shef i Shërbimit të Traumës në Sanford Level One Trauma Center, ku është edhe mjeku kryesor në Përgatitjen për Incidente me Numër të Madh të të Lënduarve, në Departamentin e Simulimit të Emergjencave dhe drejton Ekipin e Kërkimeve Kirurgjikale. Dr. Ahmeti është Drejtor i Kursit Advanced Trauma Life Support të Traumës dhe instruktor i Kursit për Zhvillimin e Ekipit të Traumës në Spitalet Rurale.
Kolegji i Kirurgëve të Kosovës, në bashkëpunim me Dr. Ahmeti, Sanford Medical Center dhe Sanford World Clinic, ka organizuar për herë të parë Kursin ATLS në Kosovë.
