Intervistë me Dr. Dardan Muçaj
Dr. Dardan Muçaj: Puna kërkimore-shkencore me rëndësi në përparim të njohurive mjekësore
Për Dr. Dardan Muçaj, specializant në Urologji, Kursi mbi Edukimin Bazik të Specializantëve të Kirurgjisë – Faza e Parë, ka qenë një mundësi e mirë, pasi që përmes moduleve, jemi njoftuar për principet bazike të punës në lëmitë e kirurgjisë, dhe se puna kërkimore-shkencore, gjithmonë është shumë me rëndësi në përparim të njohurive mjekësore.
Në një intervistë për Kolegjin e Kirurgëve të Kosovës, Dr. Dardan Muçaj, tha se “suksesi ynë ka qenë për faktin se para dhe pas çdo ligjërate, kemi bërë hulumtim dhe diskutim për temën e caktuar, si dhe kemi lexuar materialin për çdo ligjëratë”.
Megjithatë ai është shumë optimistë se Kolegji i Kirurgëve të Kosovës, do t’i ketë parasysh organizimet e tilla edhe në të ardhmen, pasi që janë në të mirë të avancimit të mjekëve të rinj, dhe se organizimet e tilla kanë efekt pozitiv ne punë e përditshme.
Kolegji i Kirurgëve të Kosovës ka përfunduar Kursin mbi Edukimin Bazik të Specializantëve të Kirurgjisë – Faza e Parë. Ju jeni dalluar në këtë kurs për pjesëmarrje aktive. Çfarë do të thotë ky kurs për ju, dhe a i keni arritur pritshmërit tuaja?
-Dr. Dardan Muçaj: Kursi mbi Edukimi Bazik i Specializantëve të Kirurgjisë, ka qenë një mundësi e mirë për neve, që edukimin bazik, principet bazike të punës në lëminë e kirurgjisë, t’i marrim nga ligjëratat, të cilat janë të njehsuara me ligjërata nga Kolegji Amerikan i Kirurgeve. Kursi, ka pas efekt shumë pozitiv për mua në punën e përditshme time në sallë të operacionit, sepse shumë principe të marra nga ky kurs, kam filluar t’i zbatoj në përditshmërinë time. Është shumë me rëndësi për çdo profesion, sidomos për profesionin e ndjeshme si kirurgjia, që si shprehi e parë e punës, të fitohen shprehi të duhura, sepse shprehitë e mira të fituara në fillim, të përcjellin gjatë gjithë jetës.
Ju se bashku me Dr. Hekuran Elezi, specializant po ashtu në Urologji, keni zënë ndër vendet e para në arritshmi në këtë kurs. Si keni arritur një sukses kaq të lartë?
-Dr. Dardan Muçaj: Në përgjithësi, kolegët nga Urologjia, kemi qenë shumë aktiv, si në pjesëmarrje, e po ashtu edhe në diskutime gjatë ligjëratave. Mendoj, që suksesi ynë ka qenë për faktin se para dhe pas çdo ligjërate, kemi bërë hulumtim dhe diskutim për temën e caktuar, si dhe kemi lexuar materialin për çdo ligjëratë, që na është dërguar në email.
Jeni specializant në Klinikën e Urologjisë, sa ju ka ndihmuar Kursi në fjalë, në avancimin tuaj profesional?
-Dr. Dardan Muçaj: Unë kam përfituar shumë prej këtij kursi, sidomos për principet bazike të punës, të cilat na janë shpjeguar nga specialistët e Kirurgjisë së Përgjithshme- Abdominale dhe Kirurgjisë Plastike dhe Rekontruktive, të cilat gjejnë shumë zbatim edhe në punën tonë në Urologji.
A do të vazhdoni me pjesëmarrjen tuaj në Fazën e Dytë të Kursit mbi Edukimin Bazik?
-Dr. Dardan Muçaj: Po, me shumë dëshirë do të marr pjesë edhe në Fazën e dytë të Kursit mbi Edukimin Bazik, dhe jo vetëm. Me më shumë dëshirë do të marrim pjesë, nëse do të organizohej ndonjë Kurs mbi Edukimin e Avancuar, sidomos ndonjë kurs, apo punëtori për laparaskopi apo endourologji, ku do të parashihej cikël i ligjëratave dhe ushtrimi në fantome me këto pajisje mjekësore. Jam shumë optimistë se Kolegji i Kirurgëve të Kosovës, do t’i ketë parasysh organizimet e tilla edhe në të ardhmen, pasi që janë në të mirë të avancimit të mjekëve të rinj.
Meqë ju jeni specializant në Urologji, dhe Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes Kongresit Klinik, kurseve, punëtorive dhe komiteteve, sa jeni i gatshëm të kontribuoni në këtë drejtim?
-Dr. Dardan Muçaj: Puna kërkimore-shkencore, gjithmonë është shumë me rëndësi në përparim të njohurive mjekësore. Prandaj, për mua dhe natyrisht edhe për të tjerët, do të ishte shumë e mirëseardhur që të jap çfarëdo kontributi në çdo kohë, qoftë në përgatitje të punimeve shkencore, apo punëtorive, që padyshim do të ishte në të mirë të edukimit të personelit shëndetësorë.