Intervistë me Dr. Mimoza Pllana
Dr. Mimoza Pllana: Kolegji i Kirurgëve të Kosovës, mundësi ideale për përfitimin e njohurive të reja profesionale
Specializantja e Gjinekologjisë dhe Obstetrisë pranë Qendrës Klinike Universitare të Kosovës, Dr, Mimoza Pllana, shpjegon se me vet faktin që është renditur në vendet e para në arritshmëri në Kursin mbi Edukimin Bazik të Specializantëve të Kirurgjisë – Faza e Parë, ka arritur pritshmëritë e saj, pasi që, siç tha ajo “specializantët pjesëmarrës kanë përvetësuar shkathtësi dhe njohuri të reja në lëmitë kirurgjike”.
Në një intervistë për Kolegjin e Kirurgëve të Kosovës, Dr. Mimoza Pllana tha se “renditja ime në vendet e para është rezultat i interesimit tim për kursin në fjalë, përgatitjes time profesionale, ngritjes së cilësisë, njohurive dhe shkathtësive të fituara nga modulet e Kursit mbi Edukimin Bazik”.
Ajo veçoi se të gjithë specializantët janë shumë me fat që Kolegji i Kirurgëve të Kosovës ka për bazë edukimin e vazhdueshëm të të gjithë neve, prandaj, ajo shtoi se “kontributi im është i pashmangshëm si përmes Kongresit Klinik, po ashtu edhe kurseve, punëtorive dhe komiteteve”.
– Kolegji i Kirurgëve të Kosovës ka përfunduar Kursin mbi Edukimin Bazik të Specializantëve të Kirurgjisë – Faza e Parë. Ju jeni dalluar në këtë kurs për pjesëmarrje aktive. Çfarë do të thotë ky kurs për ju, dhe a i keni arritur pritshmëritë tuaja?
– Dr. Mimoza Pllana: Përfitimi i shprehive të duhura të punës në fillim të karrierës si kirurge është një ndërtim i karakterit të të qenurit kirurge me përmasa profesionale dhe shkencore. Kirurgjia si lëmi fisnike, e them me plotë përgjegjësi, se e ndjejë si pjesë time të pandashme, dhe si pjesë të profesionit tim.
Për shkak të rëndësisë së vet Kursit mbi Edukimin Bazik të Specializantëve të Kirurgjisë – Faza e Parë, dhe në kuadër të përvetësimit të shkathtësive dhe njohurive të reja në lëmitë kirurgjike, pjesëmarrja ime në këtë kurs ka qenë aktive. Dua t’i përmend edhe kolegët e mi, specializantët tjerë të lëmisë së Gjinekologjisë dhe Obstetrikës, të cilët po ashtu kanë marrë pjesë në këtë organizim, që ka kontribuar në avancimin tonë profesional. Mendoj se me vet faktin që jam renditur në vendet e para në arritshmëri, e them se kam arritur pritshmëritë e mija.
– Jeni renditur në vendet e para në arritshmëri në këtë kurs. Si keni arritur një sukses kaq të lartë?
– Dr. Mimoza Pllana: Suksesi dhe renditja ime në vendet e para është rezultat i përgatitjes, dëshirës dhe vullnetit tim, hulumtimeve shkencore të kohës, pjesëmarrjes time në trajnime dhe punëtori kirurgjike, si dhe cilësisë dhe prezantimeve të 12-të moduleve thelbësore kirurgjike të Kursit mbi Edukimin Bazik, të bazuara në kurikulën e Kolegjiumit Amerikan të Kirurgjisë dhe praktikës së tyre në punën time të përditshme.
Po ashtu, këtë sukses e kam arritur edhe falë angazhimit dhe përkrahjes së mentores time, Prof. Ass. Dr. Vlora Ademi -Ibishi, që njëherit është edhe kryetare e Komitetit për Specializime, si dhe kryetare e Këshillit Organizativ dhe Mbikëqyrës të Kursit, që është një përkrahje për të gjithë ne specializantët, posaçërisht specializantëve të Gjinekologjisë me Obstetrikë.
– Jeni specializante në Klinikën e Gjinekologjisë dhe Obstetrisë. Sa ju ka ndihmuar Kursi në fjalë në avancimin tuaj profesional?
– Dr. Mimoza Pllana: Fillimi i mbarë është një vazhdimësi e suksesshme në karrierën e secilit prej nesh. Si specializante e Gjinekologjisë dhe Obstetrikës, mund të them se përvoja ime në këtë Edukim ka qenë e domosdoshme dhe fitimprurëse, dhe njëkohësisht ka një impakt në avancimin tim profesional, po ashtu edhe në cilësinë e shërbimeve kirurgjike të përditshme.
Padyshim, them se Kursi mbi Edukimin Bazik është mirëpritur nga të gjithë specializantët pjesëmarrës, dhe ka qenë një fillesë për avancimin e mëtutjeshëm profesional, në përvetësimin e njohurive edhe nga lëmia e Gjinekologjisë dhe Obstetrikës. Për këtë organizim falënderojmë Kolegjin e Kirurgëve të Kosovës që na mundësoi të përfitojmë njohuri të reja, pra ideale, në aspektin profesional mjekësor, dhe të jemi më afër kolegëve tanë ndërkombëtar.
– A do të vazhdoni me pjesëmarrjen tuaj në Fazën e Dytë të Kursit mbi Edukimin Bazik?
– Dr. Mimoza Pllana: Sa i përket pjesëmarrjes time në Kursit mbi Edukimin Bazik të Specializantëve të Kirurgjisë – Faza e Dytë, gjithsesi se do të vazhdojë aktivitetin tim aktiv. Kjo për faktin se është në dobinë time profesionale. Avancimi i mjekëve të rinj ka rëndësi të madhe, prandaj shpresoj se edhe në të ardhmen do të kemi angazhime të tilla, që janë më së të domosdoshme për specializantët e kirurgjisë.
– Meqë ju jeni specializante e Gjinekologjisë dhe Obstetrisë, dhe Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes Kongresit Klinik, kurseve, punëtorive dhe komiteteve, sa jeni e gatshme të kontribuoni në këtë drejtim?
– Dr. Mimoza Pllana: Si kirurg të rinj që jemi, është në interesin tonë që të angazhohemi në mbështetjen dhe angazhimin e secilit prej nesh për avancimin e Kirurgjisë në Kosovë. Kjo është një arsye më shumë që të japim kontributin tonë për vendlindjen tonë. Për këtë nuk do të mungojë asnjëherë vullneti dhe angazhimi im për çfarëdo kontributi për avancim të përbashkët të të gjithëve.
Prandaj, e them se unë jam e gatshme të jap kontributin tim profesional në disiplinën e Gjinekologjisë dhe Obstetrisë, por edhe nëse kërkohet në disiplinat tjera kirurgjike. Jemi shumë më fat që Kolegji i Kirurgëve të Kosovës ka për bazë edukimin e vazhdueshëm të të gjithë neve, prandaj kontributi im është i pashmangshëm edhe përmes Kongresit Klinik, po ashtu edhe përmes kurseve, punëtorive dhe komiteteve.