Intervistë me Prof. Ass. Dr. Brikena Dacaj – Elshani
11 Korrik, 2023
Prof. Ass. Dr. Brikena Dacaj-Elshani: Angazhimi i Kolegjit të Kirurgëve të Kosovës, mjaft i dobishëm dhe frytëdhënës për të gjithë mjekët
“Që kur ka filluar puna e Kolegjit të Kirurgëve të Kosovës, cilësia e punës vërehet më shumë, si për specialistët dhe veçanërisht për specializantët, të cilët po përfitojnë nga kurset/trajnimet dhe aktivitetet tjera, ku ne asnjeherë nuk hezitojmë për bashkëpunim duke ua lehtësuar punën si me ligjërata ashtu dhe punë praktike.”
Kështu tha në një intervistë për Kolegjin e Kirurgëve të Kosovës, Prof. Ass. Dr. Brikena Dacaj-Elshani, Gjinekologe – Obstetre, në Klinikën e Gjinekologjisë në Qendrën Klinike Universitare të Kosovës, Shefe e Katedrës së Gjinekologjisë me Obstetrikë, në Fakultetin e Mjekësisë, Universiteti i Prishtinës “Hasan Prishtina”, dhe anëtare e Komitetit të Kancerit të Gjirit dhe e Komitetit për Kirurgji, Endoskopike, Laparaskopike dhe Robotike, në kuadër të Kolegjit të Kirurgëve të Kosovës.
Ajo veçoi se deri me tani jemi të kënaqur me rezultatet e arritura të Komiteteve, mirëpo, sipas saj, edhe në të ardhmen presim bashkëpunime të reja, si dhe përfitime edhe më të shumta nga kolegët si brenda edhe jashtë shtetit të Kosovës.
– Kolegji i Kirurgëve të Kosovës është një institucion ku rreth vetes mbledhë kirurgët e lëmive të ndryshme, jo vetëm nga Kosova por edhe nga mbarë bota. Si e vlerësoni punën dhe angazhimin e KKK-së deri më tani?
Dr. Dacaj-Elshani: Puna dhe angazhimi i Kolegjit të Kirurgëve të Kosovës, prej kohës që ka filluar e deri në ditën e sotme, ishte mjaft e dobishme dhe frytëdhënëse për të gjithë mjekët që ishin pjesë e këtij grupi, sepse u ngritën dhe u avansuan mjaft falë bashkëpunimit edhe me kolegët që ishin pjesëmarrës si brenda dhe jashtë shtetit.
– Jeni anëtare e Komitetit për Kancerin e Gjirit, dhe e Komitetit për Kirurgji, Endoskopike, Laparaskopike dhe Robotikë, në kuadër të Kolegjit të Kirurgëve të Kosovës. Sa jeni e kënaqur me aktivitetet e këtij Komiteti, dhe cilat janë objektivat që ju prisni si rezultat i punës së përbashkët?
Dr. Dacaj- Elshani: Me rezultatet e punës së Komiteteve deri më tani jemi të kënaqur, mirëpo edhe në të ardhmen presim bashkëpunime të reja si dhe përfitime edhe më të shumta nga kolegët, si brenda edhe jashtë shtetit, për ta ngritur edhe më shumë vlerën dhe cilësinë e punës së gjinekologëve dhe kirurgëve tanë.
– Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes kurseve, punëtorive dhe komiteteve. Ju jeni pjesë e dy Komiteteve të lartpërmendura, sa jeni e gatshme të kontribuoni edhe në aktivitetet tjera të lartpërmendura?
Dr. Dacaj- Elshani: Po, është e vërtetë që kur ka filluar puna e Kolegjit të Kirurgëve të Kosovës, cilësia e punës vërehet më shumë si për gjithë specialistët, dhe veçanërishtë specializantët, të cilët po përfitojnë përmes kurseve dhe aktiviteteve tjera, ku ne asnjeherë nuk hezitojmë për bashkëpunim, duke ua lehtësuar punën si me ligjërata, po ashtu edhe në punë praktike.
– Kolegji i Kirurgëve të Kosovës është në përgatitje të Kongresit të Tretë Klinik, që sivjet mbahet me 12-15 Tetor. Si e vlerësoni zhvillimin e Kongresit të Parë dhe të Dytë Klinik të KKK-së?
Dr. Dacaj- Elshani: Kongresi i Tretë Klinik që do të mbahet më 12-15 Tetorë shpresoj se do të na dëshmojë edhe më të pregatitur, dhe më të kënaqur se në Kongresin e Parë dhe të Dytë Klinik, sepse çdo herë po ecim drejt ngritjes së cilësisë dhe punës në këto Kongrese.
– Si e vlerësoni bashkëpunimin e kirurgëve shqiptarë nga diaspora, dhe a mendoni se angazhimi i tyre në vendin e origjinës është i mjaftueshëm?
Dr. Dacaj- Elshani: Bashkëpunimi me mjekë nga diaspora vetëm sa na ndihmon në shkēmbimin e njohurive të lëmive të ndryshme, si dhe ata sigurisht i bënë të ndihen krenarë duke i ndihmuar kolegët e vendlindjes së tyre, duke ua lehtësuar që të kryen punë të mira profesionale. Këto punë, pacientëve të vendit tonë ua lehtësojnë mundësinë për trajtim në vendin tonë, jo për të ikur jashtë shtetit. Pra të gjithë kirurgët nga diaspora, duhet të vinë edhe më tepër në vendlindje, sepse vendi i tyre i pret me shumë interesim.