Intervistë me Dr. Bedri Osmanin

Kirurgu Torakal në Qendrën Klinike Universitare të Kosovës, Dr. Bedri Osmani, njëherit Kryetar i Komitetit për Sëmundje të Gjirit, anëtar i Bordit të Kolegjit të Kirurgëve të Kosovës dhe Kryetar i Shoqatës së Kirurgëve Torakal të Kosovës, thotë se themelimi dhe funksionimi i Kolegjit të Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve të kirurgjisë përmes kurseve, punëtorive dhe komiteteve.

Në një intervistë për Kolegjin e Kirurgëve të Kosovës, Dr. Osmani tha se “misioni i kirurgut është që njohuritë e tij t’i përcjellë te kolegët tjerë, prandaj të gjithë e kemi obligim avancimin e gjeneratave të reja. Personalisht kam kontribuar në vazhdimësi në përgatitje të specializantëve dhe mjekëve të rinj që vijojnë stazhin post-diplomik”. Kurse sa i përket sëmundjeve të gjirit, ai shtoi se kjo sëmundje, në veçanti kanceri i gjirit, është sëmundje që kërkon trajtim multi-diciplinar dhe të standardizuar protokollar.

Sa i përket bashkëpunimit me kirurgët shqiptarë në diasporë, Dr. Osmani thotë se është i mirëseardhur, i nevojshëm dhe i domosdoshëm për shumë arsye. Një ndër arsyet kryesore është përgatitja profesionale dhe aftësimi për përdorimin e metodave dhe aparaturave më të reja dhe më të avancuara.

Dr. Osmani: Kolegji i Kirurgëve të Kosovës është organizatë e cila bashkon të gjithë kirurgët e lëmive të ndryshme profesionale përmes programeve edukative, trajnimeve, kongreseve dhe konferencave, duke kontribuar në përmirësimin e kujdesit, standardeve dhe sigurisë në fushën e kirurgjisë. Kolegji i Kirurgëve të Kosovës prej themelimit të tij edhe përkundër vështirësive në rrugëtim, ka pas përkrahje të profesionistëve, të cilët kanë kontribuar në forma të ndryshme. Rezultatet janë të dukshme, dhe do të ketë edhe në vijim, sepse themelimi dhe funksionimi i këtij Kolegji ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve të kirurgjisë përmes kurseve, punëtorive dhe komiteteve.

Dr. Osmani: Ne jemi në kontakt të vazhdueshëm me anëtarët e komitetit, ku kemi pas takime në vazhdimësi dhe jemi në rrugë të mirë për standardizim dhe specifikim të trajtimit të sëmundjeve të gjirit në nivel të vendit, duke specifikuar detyrat dhe obligimet profesionale për trajtimin e këtyre sëmundjeve.

Sëmundjet e gjirit, e në veçanti kanceri i gjirit, është sëmundje që kërkon trajtim multidiciplinar dhe të standardizuar protokollar.

Dr. Osmani: Avancimin e gjeneratave të reja të gjithë e kemi obligim. Personalisht kam kontribuar në vazhdimësi në përgatitje të specializantëve dhe mjekëve të rinj, që vijojnë stazhin post-diplomik.

Në kuadër të ligjëratave të organizuara nga Kolegji i Kirurgëve të Kosovës, kam dhënë ligjëratën “Drenazhat Torakale në Kirurgji”. Gjithsesi, premtoj që edhe më tutje kontributi im do të jetë aty ku do të ketë nevojë për ndihmë profesionale.

Dr. Osmani: Organizimet e Kolegjit të Kirurgëve të Kosovës kanë qenë të mirëpritura, mirë-organizuara, me pjesëmarrje vendore dhe ndërkombëtare. Përmes këtyre organizimeve përveç paraqitjes së inovacioneve, teknikave dhe metodave më të reja që përdoren ne vende të ndryshme, kongreset e kaluara kanë qenë mundësi e mirë e takimit me profesionistë shëndetësorë të përmasave botërore, si dhe një mundësi e mirë për krijimin e kontakteve për vazhdim të bashkëpunimit dhe aftësimit te kuadrove te reja. Kjo do të ndikojë në rritjen e cilësisë së shërbimeve shëndetësore të vendit, si dhe rritjen e mundësisë për të ecur me kohën.

Dr. Osmani: Bashkëpunimi me kirurgët shqiptarë në diasporë është i mirëseardhur, i nevojshëm dhe i domosdoshëm për shumë arsye. Një ndër arsyet kryesore është përgatitja profesionale dhe aftësimi për përdorimin e metodave dhe aparaturave më të reja dhe më të avancuara. Mendoj që gjithmonë ka vend për më shumë, e sidomos në shëndetësinë kosovare. Në disa raste, kirurgët kanë ndihmuar, qoftë me ardhjen e tyre në Kosovë, ose përmes ndihmës që kanë ofruar për kirurgët tanë për ndonjë trajnim ose përgatitje profesionale të avancuar, por pa dyshim që duhet organizim institucional për arritje të rezultateve të dëshiruara.