Intervistë me Dr. Doruntina Bunjaku
Dr. Doruntina Bunjaku: Kursi ATLS – përvetësimi i njohurive të reja dhe përmirësim i shkathtësive praktike
Kursi Advanced Trauma Life Support – ATLS për Dr. Doruntina Bunjakun është një eksperiencë shumë e dobishme në organizimin dhe menaxhimin e traumave, identifikimin e prioriteteve të menaxhimit, përmirësimin e njohurive menaxhuese të traumave dhe shkathtësive praktike.
Në një intervistë për Kolegjin e Kirurgëve të Kosovës, Dr. Doruntina Bunjaku, Anesteziologe në Sallat Operative dhe Kujdesin Intensiv në Kardiokirurgji, QKUK, tha se “ky kurs më ka ndihmuar në disa aspekte, si përvetësimi i njohurive të reja, në përmirësimin e shkathtësive praktike, dhe në marrjen e vendimeve kritike gjatë trajtimit të traumave”.
Kurse sa i përket angazhimeve të Kolegjit të Kirurgëve te Kosovës në edukimin e specializantëve dhe mjekëve të rinj, ajo veçoi se “ këto aktivitete janë për çdo lëvdatë, andaj shpresoj të zgjerohet dhe të pasurohet edhe me bashkëpunime inter-diciplinare”.
-Kolegji i Kirurgëve të Kosovës në partneritet me 𝐒𝐚𝐧𝐟𝐨𝐫𝐝 𝐌𝐞𝐝𝐢𝐜𝐚𝐥 𝐂𝐞𝐧𝐭𝐞𝐫 𝐅𝐚𝐫𝐠𝐨, 𝐍𝐨𝐫𝐭𝐡 𝐃𝐚𝐤𝐨𝐭𝐚-Dakota e Veriut, të Shteteve të Bashkuara të Amerikës, për herë të parë ka organizuar Kursin ‘𝐀𝐝𝐯𝐚𝐧𝐜𝐞𝐝 𝐓𝐫𝐚𝐮𝐦𝐚 𝐋𝐢𝐟𝐞 𝐒𝐮𝐩𝐩𝐨𝐫𝐭® (𝐀𝐓𝐋𝐒®) 𝐊𝐨𝐬𝐨𝐯𝐚. Ju keni qenë pjesëmarrëse në këtë. Çfarë mund të na thoni rreth këtij aktiviteti, çfarë eksperience keni fituar?
Dr. Bunjaku: Advanced Trauma Life Support-ATLS është kurs që mundëson zhvillimin e aftësive menaxhuese për trauma, si dhe zbatimin e tyre në praktikë. Është kurs shumë kërkues në të cilin janë ndërthurur mësimi teorik interaktiv, simulimi i rasteve klinike dhe aplikimi i shkathtësive praktike, si dhe diskutimet në grup.
Prandaj, një eksperiencë e tillë është shumë e dobishme në organizimin dhe menaxhimin e traumave, identifikimin e prioriteteve të menaxhimit, përmirësimin e njohurive menaxhuese të traumave dhe shkathtësive praktike.
-Kursi ATLS është i akredituar nga Kolegji Amerikan i Kirurgëve. Ҫka ju ka ndihmuar ky kurs në profesionin tuaj të përditshëm?
Dr. Bunjaku: Ky kurs më ka ndihmuar në disa aspekte, si zgjerimi i njohurive të reja në përmirësimin e shkathtësive praktike dhe në marrjen e vendimeve kritike gjatë trajtimit të traumave, dhe sidomos në rëndësinë e punës ekipore dhe komunikimit mes profesionistëve shëndetësor, prej kontaktit të parë me pacientin e deri te ata që janë përgjegjës për trajtimin definitiv.
-Ju jeni në mesin e pjesëmarrësve që kanë arritur suksese në këtë kurs, dhe për këtë jeni pajisur me Certifikatë të nivelit ndërkombëtar, pra njihet në nivel global. A është kjo një shtytje drejt avancimeve, trajnimeve, kurseve të tjera që organizon Kolegji i Kirurgëve të Kosovës?
Dr. Bunjaku: Çdo herë kur je pjesëmarrës në një organizim të tillë, përveç që përfiton njohuri, të jep një shtytje për ngjarjen e radhës. Kështu e konsideroj edhe këtë kurs, dhe sigurisht që pritshmëritë janë po të njëjtat për organizimet e radhës.
-Tashmë Kolegji i Kirurgëve te Kosovës ka filluar më përgatitjet për Kongresin e Katërt Klinik. Si e vlerësoni punën e Kongreseve të mëparshme, dhe çfarë prisni nga Kongresi i radhës?
Dr. Bunjaku: Kongresi i Tretë Klinik përgjithësisht ka qenë një organizim i mirë, me një numër të madh ligjëratash dhe prezentimesh, e në disa raste nuk kishte kohë të mjaftueshme për prezantim, dhe pres që kjo do të ndërrohet në kongresin e ardhshëm, dhe të pasurohet me më shumë workshope.
-Meqë Kolegji i Kirurgëve të Kosovës ofron edukimin bazik të specializantëve dhe edukimin e mjekëve të rinj sipas standardeve profesionale perëndimore, si e vlerësoni punën dhe angazhimin e KKK-së?
Dr. Bunjaku: Për aq sa kam njohuri, angazhimi i Kolegjit të Kirurgëve te Kosovës në edukimin e specializantëve dhe mjekëve të rinj është për çdo lëvdatë, shpresoj të zgjerohet dhe të pasurohet dhe me bashkëpunime inter-diciplinare.