Intervistë me Dr. Ali Devaja
Anëtari i rregullt i Kolegjit Amerikan të Kirurgëve, Dr. Ali Devaja, dhe njëherit kirurg nga Kosova, thotë se nderimi më i madh në karrierën e tij profesionale është të qenurit pjesë e këtij Kolegji, i cili përfaqëson nivelin më të lartë të arsimit. Për rëndësinë dhe përfitimet si anëtar i Kolegjit Amerikan të Kirurgeve, Dr. Devaja thotë se kjo shërben si një ndërlidhje në komunikimin e informacionit shkencor, me dhe nga shoqëritë e botës së kirurgjisë.
Kirurgu i përgjithshëm dhe abdominal nga Kosova, Dr. Ali Devaja, ka qenë i vetmi kirurg nga Kosova i cili është anëtarësuar vitin e kaluar në këtë institucion, në mesin e shumë kirurgëve të tjerë nga vende të ndryshme të botës.
Ai shtoi se ndjehet krenar që është bërë ‘Fellow’ i Kolegjit Amerikan të Kirurgëve #ACSCC22, gjatë Ceremonisë së mbajtur vitin e kaluar në San Diego, Kalifornia, të Shteteve të Bashkuara të Amerikës.
Të qenurit anëtar i Kolegjit Amerikan të Kirurgëve (ACS) – “FACS”, sipas tij, “është nderimi më i lartë i karrierës sime profesionale, por edhe me një peshë te madhe historike, duke e përfaqësuar Kosovën për herë të parë në mënyrë të barabartë me të gjitha vendet tjera. Kredencialet “FACS” përfaqësojnë nivelin më të lartë të arsimit, ekspertizës dhe përsosmërisë në profesionalizëm shkencor në mbarë botën”.
Njëherit, ai falënderoi përzemërsisht ish-Presidenten, prof. Julie A. Freischlag për përkushtimin e jashtëzakonshëm dhe mbështetjen që ka ofruar për të njohur Kosovën, mes të gjitha vendeve të tjera në nivel profesional kirurgjik.
Për më tepër, Dr. Devaja theksoi se mirënjohja më e rëndësishme është për Presidentin aktual të ACS-se E. Christopher Ellison, për inkurajimin dhe shtrirjen e programit të ACS-së për vitin e ardhshëm.#unitedsurgeons
Po ashtu, falënderimet e tij më të përzemërta, shkojnë edhe për të gjithë stafin e #ACS, në veçanti #compusystems për përpjekjet e panumërta për ta renditur Kosovën në mesin e të gjitha vendeve të tjera, përbrenda sistemit IT-së të ACS që deri më sot nuk ekzistonte.
Po ashtu, Dr. Devaja tregon edhe për rëndësinë dhe përfitimet e të qenurit anëtar i Kolegjit Amerikan të Kirurgëve. Për këtë ai thotë se kjo shërben si një ndërlidhje në komunikimin e informacionit shkencor, me dhe nga shoqëritë e botës së kirurgjisë.
“Kolegji Amerikan i Kirurgeve ka kaq shumë për t’u ofruar kirurgëve të të gjitha specialiteteve, në çdo moment të karrierës së tyre. Nga tranzicioni në praktikën e mbështetjes për ata që sapo kanë filluar, të trajnimi dhe edukimi i vazhdueshëm, të avokimi dhe lidershipi, duke ndihmuar kirurgët të avancojnë karrierën e tyre dhe të lartësojnë profesionin. Përmes programeve të ndryshme, Kolegji Amerikan i Kirurgëve, ofron edukimin dhe trajnimin e kujdesit kirurgjikal të cilësisë më të lartë, duke aplikuar metodat e reja në botën kirurgjikale. Po ashtu, përfitimet tjera të të qenurit anëtar i Kolegjit Amerikan të Kirurgëve, është qasja në Gazetën e Kolegjit Amerikan të Kirurgëve, dhe botime të tjera, mandej mundësitë për angazhim në kongresin klinik vjetor, samitin e Lidershipit dhe Avokimit etj”, tha mes tjerash Dr. Devaja.
Ndërkohë, ai për mjekët e rinj të cilët synojnë të jenë të suksesshëm në profesionin e tyre, ka këshilla dhe një mesazh për ta. Këshilla e tij, për mjekët e rinj, sipas tij, do te ishte e bazuar në 4 shtylla kryesore, si profesionalizmi, ndershmëria, konfidencialiteti dhe altruizmi.
Këto, katër pilare, sipas tij, të virtytshme, hapin rrugën për një avancim të mëtutjeshëm në fushën profesionale mjekësore.
Dr. Ali Devaja, këshillon po ashtu, mjekët e rinj: “Ofroni kujdesin kirurgjikal të cilësisë më të lartë, merrni pjesë në mësimin gjatë gjithë jetës, qoftë me angazhim personal apo kolektiv personal. Respektoni njohuritë, dinjitetin dhe perspektivën e profesionistëve të tjerë të kujdesit shëndetësor. Duke e ditur se profesioni ynë është gjithashtu i përgjegjshëm ndaj komuniteteve tona dhe ndaj shoqërisë, prandaj punoni me shoqërinë për të krijuar shpërndarje të drejtë, efektive dhe efikase të burimeve të kujdesit shëndetësor, vetëm në këtë mënyrë do arrini synimin tuaj të kompletuar si profesionistë mjekësor”.