Intervistë me Dr. Lulzim Vokrri
11 Korrik, 2023
Serinë e intervistave me kirurgët tanë në Kosovë po e vazhdojmë me kirurgun e njohur vaskular në Qendrën Klinike Universitare të Kosovës, si dhe Nënkryetar i Komitetit për Hulumtime Shkencore në kuadër të Kolegjit të Kirurgëve të Kosovës, Dr. Lulzim Vokrri.
Dr. Lulzim Vokrri: Me punë ekipore të mirëfilltë, rezultatet nuk mungojnë asnjëherë
Dr. Lulzim Vokrri, vlerëson se Kolegji i Kirurgëve të Kosovës (KKK) ka bërë revolucion në afirmimin dhe bashkimin rreth vetes të kirurgëve më të njohur shqiptarë jo vetëm të Kosovës, por edhe jashtë kufijve të saj.
Ai thekson se bashkëpunimi më i ngushtë me kuadrin vendor është më se i domosdoshëm, pasi që siç tha ai ”nëse arrijmë të bëjmë një punë ekipore të mirëfilltë, rezultatet jo vetëm se nuk do të mungojnë asnjëherë, por do të ishin edhe më të mira, dhe puna do të ishte më shumë produktive”.
Sa i përket bashkëpunimit të kirurgëve shqiptarë nga diaspora dhe angazhimit të tyre në vendin e origjinës. Dr. Lulzim Vokrri mendon se ky bashkëpunim është i mjaftueshëm, përkundër obligimeve që ata kanë në vendet ku jetojnë dhe punojnë.
Kolegji i Kirurgëve të Kosovës është një institucion që mbledhë rreth vetes kirurgët e lëmive të ndryshme, jo vetëm nga Kosova por edhe nga mbarë bota. Si e vlerësoni punën dhe angazhimin e KKK-së deri më tani?
– Dr. Lulzim Vokrri: E them me plot përgjegjësi se Kolegji i Kirurgëve të Kosovës ka bërë revolucion në afirmimin dhe bashkimin rreth vetes të kirurgëve më të njohur shqiptarë jo vetëm të Kosovës, por edhe jashtë kufijve të saj. Kjo duhet vlerësuar jashtë mase, sepse vetëm një angazhim i tillë ka sjellë rezultate të prekshme. Prandaj, them se punën e Kolegjit të Kirurgëve të Kosovës e vlerësoj me rezultate të jashtëzakonshme dhe uroj të vazhdohet edhe më suksesshëm në të ardhmen.
Jeni Nënkryetar i Komitetit për Hulumtime Shkencore, në kuadër të Kolegjit të Kirurgëve të Kosovës. Sa jeni i kënaqur me aktivitetet e këtij Komiteti, dhe cilat janë objektivat që ju prisni si rezultat i punës së përbashkët?
– Dr. Lulzim Vokrri: Jam shumë i kënaqur me punën e Komitetit për Hulumtime Shkencore, i cili funksionon në kuadër të Kolegjit të Kirurgëve të Kosovës. Sigurisht që mund të bëhet edhe më shumë, nëse arrijmë të punojmë si ekip, natyrisht gjithnjë duke e çmuar, vlerësuar dhe respektuar njëri- tjetrin, më shumë.
Objektivat që unë pres janë:
– Koordinimi i punës së përbashkët të këtij Komiteti me Qendrën Klinike Universitare, Fakultetin e Mjekësisë dhe laboratorin për punë eksperimentale, i cili tashmë ekziston në kuadër të Fakultetit të Mjekësisë në Prishtinë. Në botën e sotme është shumë e vështirë të kryhet një hulumtim i mirëfilltë shkencor pa bashkëpunim të ngushtë me laboratorin e njësisë akademike.
– Arritjen e rezultateve të punës.
– Prezantimi dhe botimi i këtyre rezultateve.
Kolegji i Kirurgëve të Kosovës ka për bazë edukimin e vazhdueshëm të specialistëve të disiplinave të ndryshme kirurgjike, si dhe specializantëve dhe studentëve të kirurgjisë, përmes kurseve, punëtorive dhe komiteteve. Ju jeni pjesë e një Komiteti të lartpërmendur, sa jeni të gatshëm të kontribuoni edhe në aktivitetet tjera të lartpërmendura?
– Dr. Lulzim Vokrri: Unë jam pedagog i Fakultetit të Mjekësisë dhe Universitetit të Prishtinës që 25 vite. Gjithnjë jam munduar të jap maksimumin tim për edukimin profesional dhe akademik të të gjitha gjeneratave të reja. Natyrisht edhe sot jam i gatshëm ta jap kontributin tim, aty ku është e nevojshme.
Kolegji i Kirurgëve të Kosovës është në përgatitje për Kongresin e Tretë Klinik, që sivjet mbahet me 12-15 Tetor. Si e vlerësoni zhvillimin e Kongresit të Parë dhe të Dytë Klinik të KKK-së?
– Dr. Lulzim Vokrri: Zhvillimin e Kongresit të Parë dhe të Dytë të KKK-së e vlerësoj me notë të mirë. Natyrisht, gjithnjë ka hapësirë për përsosje. Unë mendoj se duhet kushtuar edhe më shumë vëmendje prezantimeve vendore.
Si e vlerësoni bashkëpunimin e kirurgëve shqiptarë nga diaspora, dhe a mendoni se angazhimi i tyre në vendin e origjinës është i mjaftueshëm?
– Dr. Lulzim Vokrri: Unë mendoj se bashkëpunimi i kirurgëve shqiptarë nga diaspora dhe angazhimi i tyre në vendin e origjinës është i mjaftueshëm, përkundër obligimeve që ata kanë në vendet ku punojnë.
Për më tepër, unë mendoj se duhet të punojmë edhe më shumë dhe të kemi një bashkëpunim edhe më të ngushtë me kuadrin vendor, sepse nëse arrijmë të bëjmë një punë ekipore të mirëfilltë, rezultatet jo vetëm se nuk do të mungojnë asnjëherë, por do të ishin edhe më të mira, dhe puna do të ishte më shumë produktive.