Marrëveshje Bashkëpunimi mes Kolegjit të Kirurgëve të Kosovës dhe Universitetit të Prishtinës “Hasan Prishtina”

Kolegji i Kirurgëve të Kosovës ka nënshkruar Marrëveshje Bashkëpunimi me Universitetin e Prishtinës “Hasan Prishtina”, për Botimin e përbashkët të Revistës Shkencore ‘Kosova Journal of Surgery’.

---

Marrëveshja e cila në emër të Kryetarit të KKK-së dhe njëherit Kryeredaktorit të revistës ‘Kosova Journal of Surgery‘ u nënshkrua nga Drejtori Ekzekutiv, Dr. Sadik Llullaku, dhe nga Rektori i UP-së, Prof. Dr. Qerim Qerimi, përcakton mes tjerash se KKK dhe UP do të punojnë për të rritur punën kërkimore dhe shkëmbimin e njohurive në disiplinat kirurgjike dhe fushat tjera të mjekësisë në Kosovë, rajon dhe më gjerë, dhe për të përgatitur revistën për aplikim për t’u indeksuar në platformat e njohura ndërkombëtare si Pubmed, Scopus, Web of Science, etj.

Gjatë lidhjes direkte virtuale nga Etiopia, Kryetari i KKK-së dhe Kryeredaktori i KJS-së, Prof. Dr. Rifat Latifi, duke falënderuar përzemërsisht Rektorin e UP-së, Prof. Dr. Qerim Qerimi, për gatishmërinë e tij dhe të bashkëpunëtorëve për të ngritur nivelin e shkencës kosovare, tha:

“Fillimi i bashkëpunimit shkencor midis KKK-së dhe UP-së, si dhe botimi i përbashkët i revistës tonë kirurgjike ‘Kosova Journal of Surgery’ ka një rëndësi të jashtëzakonshme edhe për Universitetin e Prishtinës (universitetin tim), por edhe për KKK-në, dhe de fakto fillon një kapitull i ri akademik duke u bërë një platformë e rëndësishme për shkencëtarët klinik kirurgjik dhe të tjerë të universitetit tonë, si dhe të gjithë rajonit dhe më tej, por edhe të shkencave bazike me të cilat kirurgjia ndanë aq shumë elemente mes vete.

Sepse, pa fiziologji të shëndoshë nuk mund të kemi rezultate të mira kirurgjike, pa patologji të fortë dhe të avancuar nuk mund të kemi kirurgji të avancuar, prandaj të gjitha shkencat bazike tash e kanë një platformë botuese të nivelit të lartë, një revistë shkencore të nivelit të lartë akademik dhe universitar.

Me këtë marrëveshje, KKK po bën realitet edhe një premtim tjetër, se shkenca është prioritet i jonë dhe se më nuk do të jemi në vendin e gjashtë nga fundi në botë me botime shkencore mjekësore”.