Ministri Latifi në Kongresin Botëror të Kirurgëve: punimi i tij më i miri në tre vitet e fundit
Ministri i Shëndetësisë, Prof. Dr. Rifat Latifi po merr pjesë në Kongresin Botëror të Kirurgëve, që po mbahet në Vjenë të Austrisë. Në ditën e parë të këtij Kongresi, Prof. Dr. Rifat Latifi, ka marrë pjesë aktive në shumë sesione shkencore.
Në sesionin për “Menaxhimin e Katastrofave”, u dha njoftimi se publikimi ku Ministri Latifi është bashkautor është zgjedhur si publikimi më i mirë në tre vitet e fundit në këtë fushë, punim në të cilin flitet për konceptin e ndërtimit të Qendrave të Traumës dhe të Manaxhimit të Katastrofave, me përfshirje të Qendrave të Telemjekësisë.
Tutje, ai ka theksuar edhe nevojën e bashkëpunimit të vendeve të zhvilluara me vendet që kanë nevojë për studime shkencore, duke veçuar Republikën e Kosovës, si një vend që duhet përkrahur në këtë aspekt.
Pasi që Kosova është në vendin e gjashtë nga fundi i renditjes në mesin e vendeve të botës për punime shkencore të botuara në revista mjekësore, ai përmendi nevojën urgjente për bashkëpunim me vendet e zhvilluara me qëllim që të nxitet e zhvillohet më shumë kjo lëmi në Kosovë.
“Nga viti 1998-2019, 46% e punimeve të publikuara nga Kosova, ose nuk e kanë autorin e parë të punimit nga Kosova, ose nuk kanë fare autorë nga Kosova”, theksoi Ministri Latifi.
Para audiencës, Prof. Dr. Rifat Latifi ka prezantuar një metodologji dhe teknikë të re për përkujdesje të pacientëve, që hyn në kuadër të të ashtuquajturës “Kirurgji për Kontrollin e Dëmit”, dhe që ka rezultate shumë të mira, përmes së cilës bëhet dializa e drejtpërdrejtë peritoneale.
Ministri Latifi ka takuar Presidentin lokal të Kongresit, Prof. Dr. Albert Tuchmann, me të cilin ka biseduar për mundësitë e bashkëpunimit dhe mbështetjes për sistemin shëndetësor të Kosovës në fushën e hulumtimeve shkencore.