Java e Punëtorive (2023) e Kolegjit të Kirurgëve të Kosovës
2 Maj, 2023
Kolegji i Kirurgëve të Kosovës në bashkëpunim me shoqatat, klinikat përkatëse, dhe sponsorët, organizon Javën e Punëtorive me 22-26 Maj, 2023, në Hotel International Prishtina.
Komiteti për Endoskopi, Laparoskopi, dhe Robotikë i KCS këtë vit organizon Javën e Punëtorive e cila do të mbahet nga 22 deri 26 Maj, në Hotel International Prishtina, gjersa përcjellja e intervenimeve në kohë reale mbahet në klinikat përkatëse në QKUK.
Si rregull i aktiviteteve tona kryesore vjetore, edhe kësaj here për ligjërues do të kemi ekspertë vendorë dhe ndërkombëtarë, si dhe pjesën praktike të trajnimit në fantom dhe aparaturat përkatëse (së shpejti do ta publikojmë edhe programin e detajizuar).
Për shkak të numrit të kufizuar të pjesëmarrësve, në këto punëtori do të marrin pjesë VETËM specialistët dhe specializantët e këtyre lëmive kirurgjike:
– Ortopedisë
– Kardiokirurgjisë
– Kirurgjisë së Abdominale
– Gjinekologjisë, dhe
– Kirurgjisë së Fëmijëve
Afati për regjistrim është deri me 15 Maj, por ju lutem vëni re se afati mund të mbyllet edhe më herët nëse plotësohet numri i caktuar i pjesëmarrësve, që është nga 20 pjesëmarrës për secilën punëtori.
Përderisa pagesa e caktuar për pjesëmarrje është 50 euro, duke iu falenderuar sponsorëve të sivjetëm, kjo pagesë për pjesën e kardiokirurgjisë do të mbulohet në tërësi nga sponsori, kurse për lëmitë tjera pjesëmarrësit duhet të paguajnë 50% të shumës, pra 25 euro (për detajet e kryerjes së pagesës do t’ju njoftojmë së shpejti).
Linku për regjistrim në Javën e Punëtorive: https://koscs.org/…/java-e-punetorive-e-kolegjit-te…/
Agjenda e Javës së Punëtorive – Programi Preliminar i Ortopedisë – Tema: Artroskopia:
Kështu, me 22 Maj (e hënë), në Hotel International Prishtina, Punëtoria do të filloj në ora 9:00, me hapjen zyrtare të Javës së Punëtorive, do të vazhdojë me ligjëratat “Patologjia e Meniskusit” dhe “Patologjia e ligamenteve kryeqëzore të gjurit” nga ekspertë të huaj, si dhe me pjesën praktike të ushtrimeve në fantom/aparaturat përkatëse.
Punëtoria dedikuar Artroskopisë, që përkrahet nga kompania “Agani”, është dy ditore dhe përfshin edhe transmetimin direkt të intervenimeve artroskopike në patologjinë e meniskusit dhe të ligamentit kryqëzor të gjurit (ACL), nga salla e operimit në të gjitha qendrat e Telemjekësisë, të cilat do të realizohen me 23 Maj, prej orës 9:00-12:00.
